Luk 9 | HUI | STEP | Yasuhanda ibunaga talima piaga homberiali (12) biaru olalu, Mo ngoai hadaba, lowa tigua dama daragahe karu wara tagi helobi warago tara tara bo ngaru mo dabi helobi ibugua tihondo hongo holene mini.

a 9.1Md 10.1, Mg 3.13-15

b 9.3-5Lg 10.4-11

c 9.4Md 10.11, Mg 6.10

d 9.5Md 10.14, Mg 6.11, Ab 13.51

e 9.6Mg 6.12

f 9.7-8Md 16.14, Mg 8.28, Lg 9.19

g 9.9Lg 23.8

h 9.12Md 14.15, Mg 6.35-36, Yo 6.5

i 9.18Md 16.13, Mg 8.27

j 9.19Md 14.1-2, Mg 6.14-15, Lg 9.7-8

k 9.20Md 16.15-16, Mg 8.29, Yo 6.68-69

l 9.22Md 16.21, 17.22, Mg 8.31, 9.31, Lg 9.44, 18.32-33

m 9.23Md 10.38, 16.24, Mg 8.34, Lg 14.27

n 9.24Md 10.39, Lg 17.33, Yo 12.25

o 9.25Md 16.26, Mg 8.36

p 9.26Md 10.33, Mg 8.38, Lg 12.9, 2 Ti 2.12

q 9.28-352 Pi 1.17-18

r 9.31Md 17.3, 17.9, Mg 9.4, 9.9, Lg 9.22, 13.33

s 9.32Md 17.2-3, Mg 9.2-4, Yo 1.14, 2 Pi 1.16-18

t 9.35Ais 42.1, Md 3.17, 12.18, 17.5, Mg 1.11, 9.7, Lg 3.22

u 9.44Md 16.21, 17.22, Mg 8.31, 9.31, Lg 9.22, 18.32-33

v 9.45Mg 9.32, Lg 2.50, 18.34

w 9.46Lg 22.24

x 9.48Md 10.40, 23.11-12, Mg 9.37, Lg 10.16, Yo 12.44, 13.20

y 9.49Dag 11.28, Mg 9.38

z 9.50Md 12.30, Lg 11.23

aa 9.51Mg 10.32, 16.19

ab 9.53Yo 4.9

ac 9.542 Kin 1.9-16

ad 9.611 Kin 19.20

Luke 9

Yasuhanda homberiali (12) biaruhondo, Mana lama purogo ladaba, lenego ogo

(Madiu 10.5-15, Maga 6.7-13)

1 Yasuhanda ibunaga talima piaga homberiali (12) biaru olalu, Mo ngoai hadaba, lowa tigua dama daragahe karu wara tagi helobi warago tara tara bo ngaru mo dabi helobi ibugua tihondo hongo holene mini. ^a 2 Ani buwa Yasuhanda lalu, Ngode Datagaliwabehanda Handame Ho Kagonaga bi mana lamima pialu howa warago bo ngaru mo dabi hole pilimu, lene. 3 Bi ogoni nale howa ala Yasuhanda tihondo lalu, Pialu howa mbirale nayi pilimu. Halimbubi muni ngi lowa hanagane nubi tomobi munibi tingiliya hunianebi nayiore pialu halimu. ^b 4 Mbirame tíhondo, Palimi̱ya ibidaba, larago andaga haabo halu polene tu haragola pilimu. ^c 5 Tí poramigoha mbiralime tíhondo, Palimi̱ya ibidaba, naleyagua tigua biyagoni walia hole tínaga geni abalu para kago taulo wahalu pilimu, lene. ^d

6 Ani laya handala ibunaga talima piaga biarume tagira pialu Bi Mana Debene dindi bibahende wiaruha lamigi bima pialu howa warago bo wiaru mo dabi haga bima purogo lene. ^e

Herodo ibu mini burugulo henego ogo

(Madiu 14.1-12, Maga 6.14-29)

7 Galili wali agali handame haga Herodo ibugua mbirale tara tara biayuago hale howa ibu mini burugulo hene. Irane wali agali marume lalu, Baboraya biaga Yone lone heyu daibu ka, lalu ^f 8 marume Elaya ibu lone ha pani ho ka, lalu marume, Ngode Datagaliwabe manalatagi haga mbiraligo lone heyu daibu ka, lalu lagalaga biyagola Herodo ibu mini burugulo hene. 9 Mini burugulo howa lalu, Yonenaga ma puguadaba, larugodago áyu mbirale tara tara biaruago agali aiwa biaruabe, lowa ibugua Yasu hondole henge tai bialu hene. ^g

Wali agali dewaoreme tomo no karula penego ogo

(Madiu 14.13-21, Maga 6.30-44, Yone 6.1-14)

10 Abosolo homberiali (12) biarume dai buwa tini bialu hayaru bibahende Yasuhondo lamiai hene. Ani lamiyagola Yasuhanda ti haru pialu tini hangu hole tano mbira mini Bedesaida pene. 11 Ti ani piyago hale howa wali agali bu hearume ti piyadagua haruru mama pene. Haruru mama ibiyagola Yasuhanda, Tí ibidaba, lowa Ngode Datagaliwabehanda Handame Ho Kagonaga mana lamialu howa warago bo wiarubi mo dabi halu hene.

12 Ni gai lole biyagola ibunaga talima piaga homberiali (12) biarume ibu hearia ibuwa lalu, Wali agali bu karu ogoria tomo nalu paluene henge nawidago tano emene ngaruhabi mabu anda bu karuhabi tai bima purogo lelo pudaba la, lene. ^h

13 Ani layagola Yasuhanda tihondo lalu, Ti tomo nelo tínime midaba, lene.

Ani layagola tigua ladai bialu lalu, Mberedi duria wena kira lowa hangu henedama. Wali agali bibahende bu karunaga tomo yolo bu poloma̱ya hameledebe, lene. 14 Tigua ani layago irane agali dewaore daosini duria (5,000) agima hene.

Yasuhanda ibunaga talima piaga biaruhondo lalu, Wali agali bu karuni berelo pira duria (50) dege dege bira dugu bigi bilo biradaba ladaba, lene.

15 Ani layadagua talima piaga biarume biai hayagola 16 Yasuhanda mberedi duria biarubi wena kira biago labobi mo yuwa hariha handa daga halu Ngode Datagaliwabehondo turu halu ka̱i̱ lowa mberedi gaibu baga buwa ibunaga talima piaga biaruhondo mialu, Wali agali biru ngaru talebu midaba, lene. 17 Ani layadagua biyagola ti bibahende bu hearume no karula pialu ibira hayago ibunaga talima piaga biarume nu homberia hono to̱lai hene.

Pidahanda,Mbirali Dabo Helenego ibulebira lowinigo í̠ore íbu kegoni, lenego ogo

(Madiu 16.13-19, Maga 8.27-29)

18 Horo mbiru Yasu ibu hangu howa Ngode Datagaliwabela bi lalu hearia ibunaga talima piaga biaru ibini. Ibiyagola ibugua tihondo lalu, Wali agali bu karume i̱ ai ka lalu kabe, lene. ⁱ

19 Ani layagola tigua ladai bialu lalu, Marume lalu, Í̠ baboraya biaga Yone kegoni, lalu marume, Í̠ Elaya kegoni, lalu marume, Ngode Datagaliwabe manalatagi haga bambali henego lone heyu daibu kegoni, lalu ka, lene. ^j

20 Ani ladai biyagola ibugua tihondo ladai bialu lalu, Tígua nde i̱ ai ka lalu kamibe, lene. ^k

Ani layagola Pidahanda ladai bialu lalu, Ngode DatagaliwabenagaMbirali Dabo Helenego ibulebira lowinigo í̠ore íbu kegoni, lene.

Yasuhanda ibuni tandaga nalu homolenenaga te lenego ogo

(Madiu 16.20-28, Maga 8.30—9.1)

21 Ani layagola Yasuhanda tihondo hongo howa lalu, Mbirali nalamilimu, lene. 22 Ani lowa ibugua tihondo lone lalu, Agali Hole Ibiyago tandaga timbuni naluagali ala hene miniwi karubiloma binigo mo miaga haguane karubiMana lowinigo lawai haga karubi tigua ibu hame nale howa homelo bolebira. Ani biragola howa horo kiru howa tebonengi Ngode Datagaliwabehanda ibu mo heya holebira, lene. ^l

23 Ani lowa ibugua ti bibahendehondo lalu, Mbiralime i̱ porodagua ibua ho kayagua ibuni hame ledago mitangi nabi horo bibahendengi ibuninaga ira banga yalu i̱ talima ibulene nga. ^m 24 Ogoninaga mbiralime ibuninaga holene mo tene hayagua nde holene ogoni ereba hai holebira. Anigo mbiralime ibuninaga holene wahai halu i̱ mo tene hayagua ogoni ibu holene gahenge yu holebira. ⁿ 25 Mbiralime dindi bibahendeni ngaru mo tene ho kaore ibuninaga holene maro biyagua ibu biamogo bulebirabe. Biamogo nabulebiraore. ^o 26 Mbiralime i̱ minibi i̱naga bi manabi lamulene taga hayagua Agali Hole Ibiyago ibunaga wá holene taraorebi ibu Abanaga wá holene taraorebi dahuliyali loma bia henerunaga wá holene taraorebi heba dai birangi ibugua nde o biago hondowa taga holebira. ^p 27 I̱na tíhondo heneneore larogo maru áyu ogoria karu nahome kaore Ngode Datagaliwabehanda Handame Ho Kagoria de hondolebira, lene.

Yasu mo tara ho hearia ti de hendenego ogo

(Madiu 17.1-8, Maga 9.2-8)

28 Yasuhanda bi ogoni lai ho howa horo karu agima howa Pida Yone Yamese imaru haru halu dindi hombene wiagoria iraga halu Ngode Datagaliwabela bi lole pene. ^q 29 Ibugua Ngode Datagaliwabela bi lalu hearia Yasunaga dengui mo tara howa aga biagobi demborere bialu peleore hene. 30 Ani biyagola agali kira ibu heba te lalu hene. Agali kira hayago labo Mosese Elayalame 31 dahuliya andaganaga wá taraore holene karulo howa Ngode Datagaliwabenaga galone bulene bumaro bule Yarusalemeni howa Yasu ibu abale homolebiragonaga te Yasu heba lalu hene. ^r 32 Pidabi agali kirali ibu heba hayago labobi palia hondo howa de ngala howa tigua Yasu ibu wá taraore holene karulo howa agali kirali ibu heba mandagi hearia de hendene. ^s 33 Agali kira biago labo Yasu helalu pialu hearia Pidahanda Yasuhondo lalu, Anduane-o ina ogoria kamagoni bayaledago. Iname anda nemanda mbira í̠naga bialu mende Mosesenaga tebone Elayanaga lowa bia harama, lene. Pida ibu bi ogo ale laro nale bame lope hene.

34 Ibu bi lalu heaore beraliba mbira ibiyagome ti gumba hayagola talima piaga tebirali biarume gi hene. 35 Beralibaha howa bi lowa lalu, I̱ Igini i̱ni dabo heledogo ogoni. Ibugua bi larago hale halimu, lene. ^t

36 Bi ogoni lai hayagola Yasu ibuni hangu hearia hendene. Talima piaga tebirali biarume o handayagoni horo uruningi maruhondo nalami ti bi nale hene.

Yasuhanda igiri mbiraha dama daraga hearia wara tagi henego ogo

(Madiu 17.14-18, Maga 9.14-27)

37 Horo mendengi Yasubi ibu talima piaga tebirali hayarubi ti bareni dalialu hearia wali agali dewali bu yalu ibuwa Yasu lola hene. 38 Wali agali bu heagoha howa agali mbirame laraga halu lalu, Lawai haga-o i̱ igini mbiraore ogoni hangugo í̠na dara howa de handa. 39 Damame ga̱ lalu ibu mo para howa biango bibi bia halu ne harigaha hangiau puda haea bialu mo tandaga haabo halu abale yu pe nahaga. 40 Ani biaabo hayagola í̠naga talima piaga biaruhondo, Wara tagi hadaba, larugola tigua wara tagi habe nahe haya, lene. 41 Ani layagola Yasuhanda ladai bialu lalu, Wali agali tí Ngode Datagaliwabehondo mini mbiraore nawi howa mini pu tara ho haabo kamigoni. I̱na tí kamiruha horo agiru haabo holiyadabe. I̱na tí heba howa horo agiru tínaga genda yu haabo holiyadabe, lene. Ani lowa agali biagohondo lalu, Í̠naga igini ogoria haru íbu, lene.

42 Igiri biago haru ibalu hearia damame igiri biago dindini mo para howa biango bibi bia hene. Ani biyagola Yasuhanda dama biagohondo lalu, Tagira pu, layagola igiri biago bayale hayagola ibu abahondo, Í̠ igini ebere ibirago, lene. 43 Ani biyagola wali agali bibahende bu hearume Ngode Datagaliwabenaga hongo hondowa mogo lai ho hene.

Yasuhanda ibuni homolenenaga te halu mende lenego ogo

(Madiu 17.22-23, Maga 9.30-32)

Wali agali bu hearume Yasuhanda biyagonaga mogo dege lo heagola Yasu ibugua ibunaga talima piaga biaruhondo lalu, 44 Bi mbira o langerogoore embeda nahalimu. Marume Agali Hole Ibiyago minuwa agali hongo yu karuhondo mulebira, lene. ^u 45 Ani layagola talima piaga biarume irane ogo alenaga laralo manda nabi hene. Ti manda nabilo lamia nabi ya do ho hayagola tigua ibuhondo hale hodai bulene giho hene. ^v

Bolangua ho kago aibe lenego ogo

(Madiu 18.1-5, Maga 9.33-37)

46 Ibunaga talima piaga biarume tini dege dege lalu, Bolangua howa duniniore ai ibu kabe, lowa lai lalu hene. ^w 47 Yasuhanda tinaga miniha mitangibu heago manda buwa ibugua igiri emene mbira heago ibu adogeha helowa 48 tihondo lalu, Mbiralime i̱naga minini howa igiri emene ogobigohondo, I̱la habiya íbu, layagua i̱hondobi, I̱la habiya íbu, lara. Ani buwa mbiralime i̱hondo, I̱la habiya íbu, layagua i̱hondo, Pu, layagohondobi, I̱la habiya íbu, lara. Ogoninaga mbirali tí kamigoria howa mo dindi ho kago ibuore bolangua howa duniniore kagoni, lene. ^x

Tí baba waitigi ndo karu tí aria ka, lenego ogo

(Maga 9.38-40)

49 Ani layagola Yonehanda lalu, Anduane-o agali mbirame í̠naga minini howa dama daraga hearu wara tagi halu hearia iname hondowa, Nabi waha, lamirima. Irane agali ogoni ibu ina aria ndoyanenaga lamirima, lene. ^y

50 Ani layagola Yasuhanda Yonehondobi talima piaga maru hearuhondobi lalu, Ibugua ani biragola, Nabibe, lole manda nabilimu. Mbirali tí baba waitigi ndo kago tí aria ka, lene. ^z

Samaria wali agalime Yasu ibilo hame nale henego ogo

51 Yasu ibu dahuliya andaga iraga halu polene horo kaware ha para hayagola ibuni manda bialu Yarusaleme pole pialu hene. ^aa 52 Pialu howa ibugua Samaria dindini marume mbirale mbirale manda manda bialu helonaga, Lama bamba hadaba, lene. 53 Anigo wali agali amugoniha hearume ibu Yarusaleme puabo holeyagola ti hearia ibilo hame nale hene. ^ab 54 Ani biyago hondowa talima piaga biagolabo Yamese Yonelame lalu, Anduane Homogo-o wali agali uruni irame ti dai helo iyame hariha howa ira hungu ibiraha larababe, lene. ^ac

55 Ani layagola Yasuhanda beregedowa libu talini. 56 Ani lalu bialu Yasubi ibunaga talima piaga biarubi dindi mendehayagi pene.

Yasu piyadagua haruru poa ho heneru ogo

(Madiu 8.19-22)

57 Ti harigani pole pialu howa agali mbirame Yasuhondo lalu, Í̠ poregoha i̱na talima ibaga bulebero, lene.

58 Ani layagola Yasuhanda ibuhondo ladai bialu lalu, Biango dudu ale karu dindi hau̱ha paliaga ega bedaru tinaga andaha paliaga Agali Hole Ibiyago ibu ha̱lo paluene henge nawi, lene.

59 Ani lowa Yasuhanda agali mendehondo lalu, I̱ porodagua talima ibabe, lene.

Ani layagola agali biagome lalu, Anduane-o i̱ aba ala hora hole dai berogo, lene.

60 Ani layagola Yasuhanda ibuhondo ladai bialu lalu, Homene karu tinaga homene tinime hora holene ngago. Í̠na Ngode Datagaliwabehanda Handame Ho Kagonaga mana lamule pu, lene.

61 Ani layagola agali mendeme Yasuhondo lalu, Anduane-o í̠ talima ibuliya i̱ damenehondo, Tí hondo halimu, ala lo porogo, lene. ^ad

62 Ani layagola Yasuhanda ibuhondo lalu, Mbirali ibugua dindi aliagame dindi alialu howa erembirahayagi handa dai biaabo hayagua ogoni ibu Ngode Datagaliwabehanda Handame Ho Kagonaga galone nabulene holebira.